اه يابلاد الغربة

آه يا بلاد الغربة ..
لقطه
مش هيحس بكلامي أو فضفضتي غير ناس ذاقت طعم الغربة
أو ناس كل حلمهم إنهم يسافروا برة بلدهم على اساس تكوين الثروة
ناس بعدت عن أهلها واصحابها وحبايبها
المتغربين عمومآ مهما طالت بيهم سنين الغربة فهم على يقين إنها غربة مؤقتة
ولا بد من الرجوع إلى أرض الوطن ، أرض الذكريات والشباب والصبا
علشان يقدروا يستمتعوا بالحياة
وكإن سنين الغربة جملة إعتراضية لا محل لها من الإعراب ..
هو فعلآ شعور جميل ووطني لكن أنا شايفه إنه عبارة عن كدبة بنكدبها على نفسنا
ونعللها بالآمال الزايفة
قد إيه مغتربين ماتوا في بلاد الغربة قبل ما يرجعوا لوطنهم
وكإن الموت هو المستقبل المنتظر اللي كانوا بيسعوا إليه
رهنوا أكبر جزء من حياتهم لمستقبل جايز ييجي وجايز ما يجييش أبدآ
وقد إيه منهم فضل مأجل العودة لغاية ما غزا الشيب شعره من غير ما يعود في النهاية
ومن غير ما يستمتعت بحياة الإغتراب
وقد إيه منهم قاسى وعانى الأمرين وحرم نفسه من ملذات الحياة خارج وطنه
علشان يقدر يوفر ريالات أو دينارات أو دراهم أو دولارات
اللي جمعها علشان يتمتع بيها لما يرجع وطنه
وطالت بيه سنين الغربة وهو مستمر في معاناته وإنتظاره
على أمل التمتع مستقبلآ بأحضان الوطن
وكإنه قادر على تعويض الزمان !!
عرفت ناس كتيرة سابوا بلادهم وأوطانهم وشدوا الرحال لبلاد الغربة
لتحسيين احوالهم الإجتماعية
وكنت بستغرب جدآ من ناس عايشة عيشة البؤساء لسنوات طويلة بعيدة عن اوطانهم
رغم يسر الحال نسبيآ
بحجة إن الفلوس اللي جمعوها لازم ما تمسهاااش إيد لإنها هتتصرف للعيشة
والإستمتاع بيها في أوطانهم
شفت ناااس عايشين في بيوت معدومة
ولو سألتهم ليه ما تغيروش اثاث البيت
يردوا ويقولولك أصلنا متغربين والبلد دي مش بلدنا
يبقى ليه نضيع فيها فلوسنا
وكإنهم هيعيشوا أكتر من عمر وأكتر من حياة !!
والكلام مش على المغتربين البسطاء بس لكن على الاغنياء برضه
ضحكني في مرة احد الاغنياء قبل فترة لما قالي
إنه ما بيستمتعش كتير بفيلته الفخمة وحديقته الغنّاء في بلاد الغربة
رغم إنها قطعة من الجنة
والسبب إنه بيوفر بهجته واستمتاعه للفيلا والحديقة اللي هيبنيهم في بلده إن شاء الله
على اساس إن المُلك اللي مش في بلدي لا هو لية ولا لولدي .
..
المتغربين متصورين إن السعادة هي قدامهم مش حواليهم
عبارة جميلة كان قالها مؤرخ قديم لا فاكر إسمه ولا جنسيته
بيقول فيها :
(( لا يصح أبدآ أن ننشغل بما يقع بعيدآ عن نظرنا وعن متناول أيدينا
بل يجب أن نهتم بما هو موجود بين أيدينا بالفعل ))
أدعو الله أن يرزقني بعيش النهاردة
لإن عيش النهاردة هو العيش الوحيد اللي بوسعي آكله دلوقت ..
ليه ما يسألش كل متغرب نفسه السؤال ده ويرد عليه بكل صراحة
يمكن يغيروا نظرتهم للحياة في الغربة
هل أقوم بتأجيل الحياة في بلاد الغربة من أجل الإستمتاع بمستقبل هُلامي في بلدي
أو من أجل التشوق إلى حديقة زهور سحرية في الأفق البعيد ؟
مش هلاقي رد أجمل من رد عمر الخيام
لا تشغل البال بماضي الزمان

ولا بآتي العيش قبل الأوان

واغنم من الحاضر لذاته

فليس في طبع الليالي الأمان