مسيرة الوفاء لمبارك

مسيرة الوفاء لمبارك

صعبان عليهم بحنان ماليهم ودم الشهدا على ايديه
صعبان عليهم ومرضه مبكيهم وليه احنا مصعبناش عليه

دا خدعنا قال بطل العبور وساب المجاري تطفح بحور

دا ياعم سكّنــا القبور وزرع السرطان داير ما يدور

وليه احنا مصعبناش عليه؟

لما شبابنا أصبح عاطل وهانت عليه الحياة
لما الحق أصبح باطل والظلم وصل لأقصى مداه

ليه احنا مصعبناش عليه؟

لما الأرض والعرض اتنهب لما الستر اتمزق واتكشف
لما الخق ضاع واتسلب لما الرصاص في العيون انضرب

ليه احنا مصعبناش عليه ؟

لما الواسطة أصبحت أعلى شهادة لما الشريف اُتهم وسُلب الإرادة
لما الفتوة أصبحت رمز السيادة

ليه احنا مصعبناش عليه

لما الملايين بقت معاه وليه والغلابه بايته جعانه
لما السلطة أصبحت بأيد فلانه وابنها ولي العهد بتطبطب عليه
يحكم ويأمر والغرور ماليه ليه احنا مصعبناش عليه

بنقول دا حارب!!

زعيم الأرانب الي شبابنا دَخْلها الجحور

بنقول دا حارب!!

في الشعب حارب في الشرفا حارب
في شبابنا حارب والحق حارب

وأملنا حارب ياريت زمانه بقى يغور

ليه احنا مصعبناش عليه؟

نهب بلادنا وطردنا منها خلانا بنطاطي الرؤوس
دلوقت بالثورة نرفع راسنا نزينها بعلمنا سعداء النفوس
وعِرفنا معنى أنا مصري في وسط كل الدنيا ديا
وبمصرالثورة ارتفعنا في العالم وفي الأمة العربية

ليه احنا مصعبناش عليه؟

يارب أحمي شبابنا اللى حررنا وارحم الشهدا اللى ماتوا
دول لسه بنّا زي مابشرنا كتابك وانفاسهم لسه مافاتوا

دول برضه مصعبوش عليه

يالي بكيت علي اللي انخلع وصعبان عليك
نفسي أسألك سؤال كان يبقى ايه الحال؟؟؟

لوابنك الشهيد اللي راح وسايب وراه العيال
أو ابنك مصاب وكله جراح وحاله حال

أو بنتك الصغيرة في مستشفى السرطان
أو أبوك مش لاقي الدوا وأمك كمان

أو كرامتك أهدرت ومحستش إنك إنسان
كنت برضه حتبكيه يلا روح حييه وعلى ظلمه وفْيه

واسال نفسك وضميرك ..

وليه احنا مصعبناش عليه
وليه احنا مصعبناش عليه
وليه احنا مصعبناش عليه

دا احنا مصعبناش عليه
دا احنا مصعبناش عليه
دا احنا مصعبناش عليه